Saltar ao contido
Actualidade

O PSdeG esixe transparencia e planificación no destino dos fondos da taxa turística ante a inacción do Goberno de Sanmartín

A concelleira socialista Marta Abal advirte de que xa se recadaron centos de miles de euros sen que exista unha proposta clara nin os órganos necesarios para decidir o seu uso.

O Grupo Municipal Socialista levará a cuestión ao pleno de abril para esixir explicacións e reclamar diálogo cos sectores implicados.

A concelleira do Grupo Municipal Socialista Marta Abal advertiu da “falta de planificación e transparencia” do Goberno de Goretti Sanmartín na xestión dos ingresos procedentes da taxa turística, que no orzamento municipal de 2026 ascenden a 3 millóns de euros.

Segundo explicou, “só entre outubro e decembro do pasado ano xa se recadaron arredor de 600.000 euros”, o que evidencia a relevancia destes recursos e a necesidade de definir con urxencia o seu destino.

Abal lembrou que, de acordo coa ordenanza fiscal, “o 80 % destes ingresos debe destinarse a investimentos vinculados á promoción e ao desenvolvemento do turismo sustentable”, pero advertiu de que a súa asignación require previamente o informe da Comisión Permanente do Foro de Turismo Sustentable, “un órgano que a día de hoxe nin sequera está constituído”.

Neste contexto, a concelleira socialista criticou que “nos achegamos ao ecuador do exercicio sen unha folla de ruta clara nin un calendario para poñer en marcha os mecanismos necesarios”, o que ao seu xuízo reflicte “improvisación e falta de xestión nun ámbito estratéxico para a cidade”.

Ante esta situación, o Grupo Municipal Socialista preguntará no pleno deste mes se o Goberno local “ten xa unha proposta concreta sobre o destino destes fondos e, de ser así, cando pensa dala a coñecer e trasladala aos sectores afectados”.

Para as e os socialistas, resulta fundamental avanzar con urxencia tanto na constitución da Comisión Permanente como na definición dos usos destes recursos. “Estamos a falar de fondos importantes para o presente e o futuro do turismo en Santiago, que deben ser xestionados con planificación, participación e transparencia”, subliñou a concelleira.

A edil socialista insistiu ademais na necesidade de abrir un proceso de diálogo cos sectores e entidades implicadas, advertindo de que “non se pode seguir demorando unha decisión que require consenso e visión estratéxica”. “Santiago precisa aproveitar estes recursos con criterio e pensando no interese xeral, non mantelos bloqueados pola inacción do Goberno”, concluíu.

Actualidade

Máis novas

Actualidade

O PSdeG reivindica nas rúas de Santiago o dereito á vivenda e os salarios dignos fronte ás políticas do PP e Vox

Aitor Bouza defendeu a mobilización da clase traballadora contra a especulación e carga contra o Partido Popular polos seus ataques aos sindicatos e por situarse do lado dos especuladores. O candidato socialista ao Senado, Gumersindo Guinarte, denunciou que PP e Vox bloquearon reiteradamente no Congreso medidas impulsadas polo Goberno de Pedro Sánchez para garantir o […]

Actualidade

O PSdeG denuncia que o Goberno de Sanmartín deixa ás asociacións veciñais apenas dous días para xustificar as subvencións

Gumersindo Guinarte critica que as axudas non se aprobasen ata este luns, día 9, cando o prazo de xustificación remata o mércores 11, coincidindo ademais coa folga xeral. Os socialistas denuncian tamén a redución de 8.000 euros no orzamento da convocatoria e cuestionan que a concesión das axudas se comunicase por correo electrónico en lugar […]

Actualidade

Pedro Blanco sitúa a mobilidade e os equipamentos públicos entre as prioridades para Santa Marta

Abordou coa veciñanza a situación da mobilidade na contorna do Complexo Hospitalario Universitario de Santiago (CHUS), especialmente ante a súa ampliación, e reclama a Xunta e Concello coordinación e transparencia sobre o proxecto para prever solucións nos accesos e o estacionamento. O candidato socialista á Alcaldía agradeceu á asociación veciñal o traballo que desenvolve e […]