Saltar ao contido
Actualidade

O PSdeG esixe ao Goberno de Sanmartín que licite de inmediato as obras do Vero Boquete e reclama máis implicación da Xunta nas infraestruturas deportivas

Aitor Bouza denuncia que, cinco meses despois da sinatura do convenio coa Deputación, o proxecto segue sen licitar.

O socialista reclama dilixencia ao Concello e pide á Xunta de Rueda que “arrime o ombreiro” e invista en Santiago como fai noutras cidades.

O PSdeG levará ao Parlamento a falta de compromiso da Xunta coas infraestruturas deportivas da cidade.

O secretario xeral do PSdeG de Santiago e deputado autonómico, Aitor Bouza, reclamou ao Goberno municipal que licite “de maneira inmediata” as obras de rehabilitación do estadio Vero Boquete de San Lázaro, unha actuación que considera prioritaria para a cidade.

Bouza advertiu de que, pese a existir un convenio coa Deputación da Coruña asinado no mes de novembro e aprobado previamente no pleno provincial, “a día de hoxe, máis de cinco meses despois, ese contrato segue sen licitar”. Un acordo que supón un investimento moi relevante, financiado maioritariamente pola Deputación, que achega arredor do 80% dos fondos, e advertiu de que o atraso na tramitación “pon en risco o cumprimento dos prazos previstos”, segundo explicou o deputado socialista.

Neste sentido, advertiu de que, “estando xa a piques de entrar no mes de abril”, será posible executar as obras no prazo previsto sen ter que recorrer a unha prórroga, e advertiu de que non sería aceptable que unha actuación “tan necesaria e demandada” se siga demorando.

Bouza reclamou ao Goberno de Sanmartín “dilixencia e operatividade” e instou á alcaldesa a explicar “por que a día de hoxe estas obras seguen sen licitar” e cando prevé activar o procedemento. Ademais, subliñou a importancia de que o proxecto se desenvolva “con diálogo coas entidades deportivas e cos clubs”, e de maneira especial co Compos, como principal usuario da instalación, garantindo que a actuación responda ás necesidades reais do tecido deportivo da cidade.

Neste sentido, advertiu de que os prazos previstos evidencian a falta de planificación do Goberno municipal, xa que o proxecto contempla arredor de sete meses de licitación e once meses de execución das obras. A pesar diso, o Concello sostén que a actuación se desenvolverá ao longo de 2026, algo que Bouza cualificou de “incoherente” ao non cadrar cos tempos reais, o que fai practicamente inevitable que o Concello teña que recorrer a unha prórroga.

O secretario xeral do PSdeG de Santiago puxo tamén o foco na Xunta de Rueda e reclamou un maior compromiso coas infraestruturas deportivas de Compostela. “É posible facelo”, sinalou, lembrando investimentos recentes noutras cidades como Ferrol, onde o Goberno galego comprometeu importantes recursos.

Bouza criticou que a Xunta “non pode seguir mirando cara outro lado” mentres a cidade precisa investimentos neste ámbito, e anunciou que o PSdeG levará esta cuestión ao Parlamento de Galicia para esixir explicacións e medidas concretas.

Así mesmo, reclamou tamén á alcaldesa que defenda os intereses da cidade e que esixa á Xunta o mesmo nivel de compromiso económico que noutras cidades galegas. “O deporte tamén é calidade de vida e precisa infraestruturas á altura do traballo que realizan clubs e deportistas”, concluíu.

Actualidade

Máis novas

Actualidade

O PSdeG reivindica nas rúas de Santiago o dereito á vivenda e os salarios dignos fronte ás políticas do PP e Vox

Aitor Bouza defendeu a mobilización da clase traballadora contra a especulación e carga contra o Partido Popular polos seus ataques aos sindicatos e por situarse do lado dos especuladores. O candidato socialista ao Senado, Gumersindo Guinarte, denunciou que PP e Vox bloquearon reiteradamente no Congreso medidas impulsadas polo Goberno de Pedro Sánchez para garantir o […]

Actualidade

O PSdeG denuncia que o Goberno de Sanmartín deixa ás asociacións veciñais apenas dous días para xustificar as subvencións

Gumersindo Guinarte critica que as axudas non se aprobasen ata este luns, día 9, cando o prazo de xustificación remata o mércores 11, coincidindo ademais coa folga xeral. Os socialistas denuncian tamén a redución de 8.000 euros no orzamento da convocatoria e cuestionan que a concesión das axudas se comunicase por correo electrónico en lugar […]

Actualidade

Pedro Blanco sitúa a mobilidade e os equipamentos públicos entre as prioridades para Santa Marta

Abordou coa veciñanza a situación da mobilidade na contorna do Complexo Hospitalario Universitario de Santiago (CHUS), especialmente ante a súa ampliación, e reclama a Xunta e Concello coordinación e transparencia sobre o proxecto para prever solucións nos accesos e o estacionamento. O candidato socialista á Alcaldía agradeceu á asociación veciñal o traballo que desenvolve e […]