Saltar ao contido
Actualidade

O PSdeG denuncia a parálise do Goberno  de Sanmartín na venda de parcelas estratéxicas e o abandono do Parque de Carlomagno 

A concelleira Marta Abal denuncia a parálise na venda de parcelas fundamentais para proxectos clave e o abandono do Parque de Carlomagno, e esixe á alcaldesa Sanmartín unha actuación urxente para desbloquear estas cuestións que afectan ao desenvolvemento local. 

O Grupo Socialista advirte da ameaza que supón a inacción da señora Sanmartín para os investimentos municipais e reclama solucións urxentes. 

Santiago de Compostela, 27 de maio de 2025. O Grupo Municipal Socialista de Santiago de Compostela levará ao Pleno do 3 de xuño dúas iniciativas co obxectivo de denunciar a inacción do Goberno de Sanmartín en cuestións clave para o futuro da cidade: a venda de parcelas municipais incluídas no orzamento de 2025 e o lamentable estado de abandono do Parque de Carlomagno, no barrio de Fontiñas. 

A primeira, unha pregunta formulada pola concelleira Marta Abal, cuestiona a total ausencia de avances na venda de catro parcelas municipais que deberían achegar 5,8 millóns de euros aos investimentos da cidade. “Se esas parcelas non se venden este ano, proxectos como a cociña central para os comedores escolares ou a compra de inmobles para servizos públicos non se van poder executar. Están xogando con fume”, advertiu Abal. 

O PSdeG lembra que eses ingresos representan case o 50 % do capítulo de investimentos do Concello e denuncia que, a estas alturas do ano, non hai rastro do procedemento de licitación. “Comprometer proxectos sen garantir os cartos é unha grave irresponsabilidade”, afirmou. 

MANTEMENTO DO PARQUE DE CARLOMAGNO 

Por outra banda, o Grupo Municipal Socialista presentará un rogo en relación co lamentable estado de abandono do Parque de Carlomagno, situado no barrio de Fontiñas. “Este parque, un dos pulmóns verdes da cidade, presenta unha falta de mantemento importante, existindo partes nas que a herba chega, literalmente, á altura dos xeonllos”, denunciou Abal. “A imaxe que se transmite é de descoido absoluto, polo que resulta urxente que se adopten as medidas necesarias para garantir un mantemento axeitado e regular deste espazo público”. 

O PSdeG reclama, así, que a señora Sanmartín actúe de maneira inmediata para poñer fin á situación actual, tanto no que respecta á transparencia e execución do orzamento, como á conservación dos espazos públicos. 

Con estas dúas iniciativas, o Grupo Socialista reafirma o seu compromiso cunha xestión municipal transparente, eficaz e centrada nas necesidades reais da veciñanza de Santiago de Compostela. 

Actualidade

Máis novas

Actualidade

O PSdeG reivindica nas rúas de Santiago o dereito á vivenda e os salarios dignos fronte ás políticas do PP e Vox

Aitor Bouza defendeu a mobilización da clase traballadora contra a especulación e carga contra o Partido Popular polos seus ataques aos sindicatos e por situarse do lado dos especuladores. O candidato socialista ao Senado, Gumersindo Guinarte, denunciou que PP e Vox bloquearon reiteradamente no Congreso medidas impulsadas polo Goberno de Pedro Sánchez para garantir o […]

Actualidade

O PSdeG denuncia que o Goberno de Sanmartín deixa ás asociacións veciñais apenas dous días para xustificar as subvencións

Gumersindo Guinarte critica que as axudas non se aprobasen ata este luns, día 9, cando o prazo de xustificación remata o mércores 11, coincidindo ademais coa folga xeral. Os socialistas denuncian tamén a redución de 8.000 euros no orzamento da convocatoria e cuestionan que a concesión das axudas se comunicase por correo electrónico en lugar […]

Actualidade

Pedro Blanco sitúa a mobilidade e os equipamentos públicos entre as prioridades para Santa Marta

Abordou coa veciñanza a situación da mobilidade na contorna do Complexo Hospitalario Universitario de Santiago (CHUS), especialmente ante a súa ampliación, e reclama a Xunta e Concello coordinación e transparencia sobre o proxecto para prever solucións nos accesos e o estacionamento. O candidato socialista á Alcaldía agradeceu á asociación veciñal o traballo que desenvolve e […]