Saltar ao contido
Actualidade

O PSdeG acusa ao PP de antepoñer intereses partidistas á solución do Ciclo Integral da Auga en Santiago

Guinarte denuncia que o portavoz popular, o señor Verea, prefire atrasar a licitación para poder controlala se chega á Alcaldía en 2027, en lugar de garantir agora unha solución para a cidade.

Os socialistas cualifican esta postura de “falta absoluta de responsabilidade” e advirten de que a xestión da auga é un servizo esencial que non pode quedar supeditado a estratexias electorais.

O PSdeG critica tamén que o BNG non apoiase a proposta socialista de iniciar xa o proceso de licitación, malia que Santiago, o seu rural e as instalacións do río Tambre non poden seguir esperando.

O voceiro do Grupo Municipal Socialista, Gumersindo Guinarte, denunciou no Pleno municipal celebrado hoxe o que cualificou como unha “mostra moi evidente da falta de compromiso do Partido Popular especialmente coa cidade de Santiago” en relación coa concesión do Ciclo Integral da Auga.

Segundo explicou Guinarte, o portavoz do Grupo Popular, Borja Verea, recoñeceu expresamente que, no caso de ser alcalde en 2027, iniciaría a redacción dos pregos para a concesión, pero rexeitou apoiar que o Concello licite xa ese contrato. Ao seu xuízo, esa posición evidencia que “non quere resolver o problema, os problemas, que son moitos, da xestión da auga en Santiago de Compostela, senón que o que quere é controlar a saída da concesión se é alcalde no ano 27”.

Guinarte criticou que o PP antepoña un cálculo político á necesidade de dar resposta inmediata ás necesidades da cidade e cualificou esa postura de “falta absoluta de responsabilidade”.

O voceiro socialista lembrou que a proposta defendida polo grupo socialista na Comisión do Ciclo Integral da Auga apostaba por iniciar de maneira inmediata o proceso de licitación da nova concesión, ao considerar que a situación actual require solucións urxentes.

Porén, segundo denunciou, tampouco o Goberno municipal, especialmente o BNG, amosou responsabilidade ao non apoiar esta iniciativa. “Santiago non pode esperar, o rural de Santiago non pode esperar, as instalacións para extracción de auga do río Tambre non poden esperar”, advertiu, insistindo en que demorar a saída da concesión supón ir “en contra dos intereses dos veciños e das veciñas de Santiago”.

Para os socialistas, a xestión do Ciclo Integral da Auga é unha cuestión estratéxica que require visión de cidade e responsabilidade institucional, e non pode quedar condicionada a intereses partidistas nin a cálculos electorais.

Guinarte instou tanto ao Partido Popular como ao Goberno municipal a abandonar a confrontación e asumir a urxencia de iniciar o proceso de licitación, ao considerar que garantir un servizo esencial como o da auga debe estar por enriba de calquera estratexia política.

Actualidade

Máis novas

Actualidade

O PSdeG reivindica nas rúas de Santiago o dereito á vivenda e os salarios dignos fronte ás políticas do PP e Vox

Aitor Bouza defendeu a mobilización da clase traballadora contra a especulación e carga contra o Partido Popular polos seus ataques aos sindicatos e por situarse do lado dos especuladores. O candidato socialista ao Senado, Gumersindo Guinarte, denunciou que PP e Vox bloquearon reiteradamente no Congreso medidas impulsadas polo Goberno de Pedro Sánchez para garantir o […]

Actualidade

O PSdeG denuncia que o Goberno de Sanmartín deixa ás asociacións veciñais apenas dous días para xustificar as subvencións

Gumersindo Guinarte critica que as axudas non se aprobasen ata este luns, día 9, cando o prazo de xustificación remata o mércores 11, coincidindo ademais coa folga xeral. Os socialistas denuncian tamén a redución de 8.000 euros no orzamento da convocatoria e cuestionan que a concesión das axudas se comunicase por correo electrónico en lugar […]

Actualidade

Pedro Blanco sitúa a mobilidade e os equipamentos públicos entre as prioridades para Santa Marta

Abordou coa veciñanza a situación da mobilidade na contorna do Complexo Hospitalario Universitario de Santiago (CHUS), especialmente ante a súa ampliación, e reclama a Xunta e Concello coordinación e transparencia sobre o proxecto para prever solucións nos accesos e o estacionamento. O candidato socialista á Alcaldía agradeceu á asociación veciñal o traballo que desenvolve e […]